ಮೌನದ ಬದುಕು

ಬದುಕಲಿ ಹೇಗೆ ನಾ ನಿನ್ನ ಮರೆತು

ಜೀವನ ಕಂಡಿದೆ ಬಹು ದೊಡ್ಡ ಶೂನ್ಯದಂತೆ

ಸಾಗಲಿ ಹೇಗೆ ನಾ ನಿನ್ನ ಬಿಟ್ಟು

ಹೆಜ್ಜೆಗಳು ಭಾರವಾಗಿ ಚಲನೆ ಮರೆತಂತೆ

ಕಣ್ಣೋಟದಿ ಕಾಣುವ ಪ್ರತಿ ಜೀವ ನೀನಾಗಿ

ಕಣ್ಣು ತೆರೆದರೂ ಪ್ರಪಂಚ ಕಾಣದ ಕುರುಡಿಯಂತೆ

ಈ ಹೀನಾಯ ಶಿಕ್ಷೆ ನೀಡಿದೆ ಏಕೆ ನನಗೆ

ಅಪರಾಧಿ ನಾನಲ್ಲ ಆದರೂ ಅಪರಾಧಕ್ಕೆ ಬಲಿಯಾದಂತೆ

ಸೋಲು ಕಂಡ ಹೃದಯಕೆ ಗೆಲುವಿನ ದಾರಿ ಗೊತ್ತಿಲ್ಲ

ಗುರಿ ಮರೆತು ಸಾಗುತಿದೆ ಅಲೆಮಾರಿಯಂತೆ

ಸತ್ತ ಜೀವವ ಮತ್ತೊಮ್ಮೆ ಕೊಲ್ಲುವ ಆಸೆ ಏಕೆ

ಕೊನೆ ಉಸಿರಲೂ ಕೂಗುವ ದನಿ ನಿನ್ನ ಹೆಸರಂತೆ

ಮೌನದ ಬದುಕು ಸಾಕಿನ್ನು ಗೆಳೆಯ ಹೆಚ್ಚೇನು ಹೇಳಲಿ

ಮುಗ್ಧ ಭಾವದಿ ಸುರಿಸುತಿವೆ ಕಂಗಳು ಸಂಜೆಯ ಮಳೆಯಂತೆ